Татарстан Республикасыннан гаилә «Это у нас семейное» конкурсында җиңүчеләр рәтенә керде
Гаилә, мәхәббәт һәм тугрылык көнендә Мәскәүдә «Россия – мөмкинлекләр иле» Президент платформасының «Это у нас семейное» конкурсының икенче сезонына нәтиҗә ясадылар. Россиянең 43 төбәгеннән 60 гаилә командасы, шул исәптән Татарстан Республикасыннан килгән гаилә, торак шартларын яхшырту өчен 5әр миллион сумлык сертификатка ия булды. Бу акчалар гаиләләр өчен балалары үсәчәк һәм гаилә тарихлары дәвам итәчәк өйләренә таба мөһим адым. Моннан тыш, конкурс финалына чыккан 328 гаилә дә ил буйлап уртак сәяхәткә чыгачак.
«Россия – мөмкинлекләр иле» Президент платформасының «Это у нас семейное» конкурсының икенче сезоны финалында Россиянең 85 төбәгеннән 328 гаилә командасы катнашты. Дүрт көн дәвамында финалга чыгучылар бәяләү биремнәрен үттеләр, Россиянең мәдәни кодына багышланган чараларда катнаштылар һәм илнең төрле төбәкләреннән килгән гаиләләр белән аралаштылар.
Финалга чыгучыларга Россия Федерациясе Президенты Администрациясе җитәкчесенең беренче урынбасары Сергей Кириенко мөрәҗәгать итте. Ул билгеләп үткәнчә, конкурс ярыш кына түгел, ә бөтен Россия буенча гаиләләр өчен яңа традициягә әверелде.
«Безнең Президент әйткәнчә, Россия – ул гаиләләр гаиләсе. Һәм сез – моның ачык мисалы. Кичә миңа бераз катнашырга, йөрергә, конкурс биремнәренең ничек үтүен карарга насыйп булды. Әйе, барысы да дулкынланды, ярыш катлаулы булды. Ләкин беләсезме, мин залда күзәтүче булганда иң мөһиме нәрсә күрдем? Мәхәббәт, хөрмәт. Бер – берегезгә сак кына ярдәм итүегез, бер-берегез өчен җан атуыгыз, ярдәм итүегез – җылылык, чын мәхәббәт, чын хөрмәт һәм бәхет үрнәге ул. Сез, сезнең гаиләләр – Россиянең горурлыгы. Бәйрәм белән сезне!» –диде Сергей Кириенко.
Сергей Кириенко костюмнар сайлауда иҗади якын килүләре өчен аерым рәхмәт белдерде: катнашучылар үз гаиләләрен генә түгел, туган төбәкләрен дә, аның гореф-гадәтләрен һәм мәдәниятен дә күрсәтә алдылар. Ул шулай ук Күзәтчелек советы утырышында иң яхшы костюмнар сайлау өчен ачык тавыш бирүне башлап җибәрү турында карар кабул ителүен хәбәр итте. Иң яхшы костюм авторлары Россиянең иң яхшы дизайнерлары белән кием коллекциясен булдыру өстендә эшләү мөмкинлеге алачак.
Россия Федерациясе Хөкүмәте Рәисе урынбасары Татьяна Голикова финалга чыгучыларны Гаилә, мәхәббәт һәм тугрылык көне белән котлады һәм «Гаилә» милли проектына керә торган конкурсның гаилә турындагы иң кирәкле проектларның берсе булуын билгеләп үтте.
«Конкурс Дәүләт башлыгы игълан иткән Россия халыклары бердәмлеге елында уза. Нык гаилә – ул Россиядә яшәүче барлык 194 халык өчен абсолют өстенлек һәм төп кыйммәт. Бу безнең күпмилләтле илебезнең бүгенгесе һәм киләчәге, аның какшамас таянычы. Кешеләрнең якыннары ярдәме, туганнары белән өзелмәс элемтәләре, балаларны үстерү һәм аларга үз тәҗрибәләрен тапшыру теләге булганда, балаларның һәм оныкларның көлүләре һәрвакыт ишетелә торган йорт булганда – иртәгесе көнгә ышаныч ныгый. Конкурсның икенче сезонында 726 мең кеше – 82 илдә яшәүче туганнары белән бергә бөтен илдән 200 меңгә якын гаилә катнашты. Без проект масштабларына әле ике ел элек үк шаккаттык, әмма икенче сезон беренчесенең рекордларын чиреккә диярлек уздырды. Димәк, безнең Президентның конкурсны башлап җибәрү карары бөтен халык тарафыннан хупланган. Биредә күп балалы гаиләләрне, зур гаилә стажы булган гаиләләрне, күп буынлы гаиләләрне һәм гаилә династияләрен күрү аеруча күңелле. Финалга чыккан 328 гаиләдән шундыйлар – абсолют күпчелек», – дип ассызыклады Татьяна Голикова.
Татарстан Республикасыннан «Россия – мөмкинлекләр иле» Президент платформасының «Это у нас семейное» конкурсында Кожевниковлар, Курушиннар гаиләсе җиңүче булды. Казаннан гаилә командасында биш кеше: әнисе Оксана, улы Михаил (23 яшь), кызы Валерия (18 яшь), Михаилның хатыны Надежда һәм әбисе Надежда Александровна. Гаилә «Это у нас семейное» конкурсының беренче сезоны финалистлары булган. Команда сәяхәт итәргә ярата, һәм хәтта бер тапкыр Пасханы Мәскәүдә Христос Коткаручы храмында каршы алган.
«Гаҗәеп хис, бөтенләй көтелмәгән. Бары тик шатлык, бәхет һәм без боларның барысын да үзебезнең дус гаиләбез ярдәмендә эшләвебезне аңлау хисе белән тула. Гаилә булу – һәрвакыт дус булу, барыбыз бергә булу. Беркайчан да бер-береңнерәнҗетмәскә, һәрвакыт ярдәм итәргә. Мондый күңелле, шәп, бердәмлекне ныгыта торган бәйгеләрдә һичшиксез катнашырга кирәк. Әлеге чара яшь буынга ниндидер уртак эштә катнашып, барысына да ирешергә мөмкин булуын күрсәтә. Бу безнең көчебез, таянычыбыз. Аның каравы, барысыныкы кебек түгел – бу безнең гаиләдәгечә», - диделәр Кожевниковлар, Курушиннар гаиләсе әгъзалары.
«Россия – мөмкинлекләр иле» Президент платформасы генераль директоры, «Сенеж» Идарә остаханәсе ректоры һәм Күзәтчелек советы рәисе урынбасары Андрей Бетин сезонга йомгак ясады.
«Это у нас семейное» конкурсы ике сезон эчендә чын-чынлап халыкныкына әйләнде. Ул Россиядә меңнәрчә көчле, җылы, нык гаиләләр яшәвен исбатлады. Яше, һөнәре, гореф – гадәтләре, милләтләре буенча бөтенләй төрле. Әмма иң мөһиме – мәхәббәт, сабырлык, ышаныч, тыңлый һәм ишетә белү, юл кую һәм килешүләр төзү, уртак җиңүләргә шатлану һәм авырлыкларны бергә кичерү. Чөнки гаилә – кеше тормышында төп команда. Икенче сезонны без баерак һәм яктырак иттек. Биремнәр күбрәк, мөмкинлекләр күбрәк, финалда гаиләләр күбрәк. Конкурс гаиләләр белән бергә үсә, чөнки ул төп ихтыяҗга җавап бирә: бергә булу, таяныч тою, үзең генә түгел икәнеңне белү. 5әр миллион сумлык 60 сертификат – 60 гаилә өчен үз хыялларына таба адым ясау мөмкинлеге: йорт, фатир сатып алу, ипотеканы ябу. Һәм бу узган ел белән чагыштырганда ике тапкырга диярлек күбрәк. Ә барлык финалистлар да Россия буенча уртак сәяхәтләргә китәчәк. Әмма конкурсның төп бүләге инде сезнең һәрберегездә. Бу нык, яратучан гаиләләрегез», – дип билгеләде Андрей Бетин.
Икенче сезонның 60 командасы җиңүче булды, аларның составында 401 кеше. Алар арасында 157 бала, 123 ата-ана, 92 әби-бабай буыны вәкиле, шулай ук 29 башка туганнары бар. Иң яшь җиңүчеләргә – 6 яшь, иң өлкән катнашучыга 80 яшь. Җиңүчеләр арасында иң күп балалы гаилә 36 бала тәрбияли, җиңүчеләр арасында иң зур никах стажы – 53 ел.
Җиңүче гаиләләр Россиянең 43 төбәгеннән һәм барлык федераль округлардан, шул исәптән Донбасс һәм Новороссиядән. Җиңүчеләр арасында – күп балалы һәм тәрбиягә алган гаиләләр, махсус хәрби операциядә катнашучыларның гаиләләре, хезмәт һәм иҗат династияләре, спортчылар, активистлар, хезмәт ветераннары. Иң зур команда 29 кешене берләштерде.
Җиңүче гаиләләр торак шартларын яхшырту өчен 5әр миллион сумлык сертификатка ия булдылар. Акчаларны йорт яки фатир сатып алуга, шулай ук ипотеканы түләүгә яки торак өчен беренчел кертем кертүгә тотарга мөмкин.
«Это у нас семейное» конкурсының икенче сезонында Россиянең 89 төбәгеннән 726 191 кеше – 82 илдә яшәүче туганнары белән бергә 196 576 гаилә катнашты. Финалга округ ярымфиналлары һәм өстәмә онлайн-биремнәр нәтиҗәләре буенча иң яхшы нәтиҗәләр күрсәткән гаиләләр чыкты. Дистанцион этап 48 биремне үз эченә алды, аларның нәтиҗәләре буенча гаиләләр 11 мең фото, видео һәм текст тасвирламасы төзегән. Конкурс өчен төшерелгән видеоматериалларның озынлыгы 2 441 сәгать тәшкил итте.
«Это у нас семейное» конкурсы – «Гаилә» милли проектының бер өлеше. Катнашучыларның гаилә командалары бер-берсенә карата өч һәм аннан да күбрәк буын вәкилләре булган дүрт һәм аннан да күбрәк кешедән төзелде.