Татарстанның хәрби-патриотик клублары вәкилләрен «Геройлар белән диалоглар» проекты семинарына чакыралар

2026 елның 21-24 августында Алтай краенда узачак «Геройлар белән диалоглар» Бөтенроссия проекты кысаларында хәрби-патриотик клублар вәкилләре өчен семинарга теркәлү ачык.

Катнашуга 18 яшьтән өлкәнрәк Россия Федерациясе гражданнары: хәрби-патриотик клублар җитәкчеләре, координаторлары, инструкторлары, методистлары, активистлары һәм катнашучылары, ветераннар оешмалары вәкилләре, шулай ук башкарма хакимият органнарының балаларны һәм яшьләрне гражданлык-патриотик тәрбияләү өлкәсендәге проектларын гамәлгә ашыручы белгечләре чакырыла.

Семинарның максаты — гражданлык-патриотик тәрбия системасын үстерү, буыннар арасындагы хезмәттәшлекне ныгыту, иҗтимагый инициативаларга ярдәм итү һәм яшьләр белән эшләү өлкәсендә иң яхшы практикалар белән уртаклашу.

Дүрт көн дәвамында Россиянең төрле төбәкләреннән 140 катнашучы хәрби-патриотик тәрбия өлкәсендә әйдәп баручы экспертлар белән эшләячәк. Программага патриотик эшне оештыруга заманча алымнар турында фикер алышу, уңышлы практикалар белән уртаклашу, шулай ук хәрби-патриотик клублар ассоциациясе кысаларында үзара хезмәттәшлекнең яңа механизмнарын эшләү керә.

Семинар йомгаклары буенча яшьләргә гражданлык-патриотик тәрбия бирү буенча заманча проектлар тәкъдим итү, эшчәнлекнең төп юнәлешләре буенча даими эшче комитетлар булдыру һәм Бөтенроссия һөнәри бергәлеген үстерү буенча алдагы адымнарны билгеләү планлаштырыла.

Чараны Россия ДОСААФ хәрби-патриотик клублары ассоциациясе ярдәмендә Роспатриотцентр  оештыра.

Катнашуга гаризаны 2026 елның 31 июленә кадәр «Россия яшьләре» федераль дәүләт автоматлаштырылган мәгълүмат системасы аша сылтама буенча бирергә мөмкин.