Наше время-Безнең заман: Казанда эшче яшьләр фестивале җиңүчеләре билгеле булды
«Наше время-Безнең заман» IX эшче яшьләр иҗаты ачык республика телевизион фестиваленең Гала – концерты үтте. Чара «Пирамида» мәдәни-күңел ачу комплексында узды.
Гала-концерт гадәттәгечә катнашучылар парадыннан һәм Татарстан Республикасы Президенты Рөстәм Миңнехановның сәламләү сүзләреннән башланды.
«Без бу эшнең бик уңай нәтиҗәләрен күрәбез. Эшче яшьләр иҗаты фестивале Татарстанның гомумтанылган проекты булды. Мин катнашучыларга активлыгыгыз өчен рәхмәт белдерәсем килә. Сез яхшы эшләвегез белән генә чикләнмичә, иҗат белән шөгыльләнү мөмкинлеге дә табасыз. Фестивальдә катнашучыларның һәрберсен инде җиңүче дип саныйм. Сезгә киләчәктә дә җитештерү эшендә һәм иҗатта уңышлар телим», - диде Рөстәм Миңнеханов.
Фестивальнең төп бүләге-гран-прига «Аммоний» АҖ лаек булды. Алар Татарстан Республикасы Президенты Кубогын һәм 500 мең сум күләмендә акчалата премия алдылар. Бүләкне Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Алберт Кәримов һәм Татарстан Республикасы Яшьләр эшләре министры Тимур Сөләйманов тапшырдылар.
«Эшләүче яшьләр-Татарстанда иң күп санлы яшьләр аудиториясе. Бүген республика предприятиеләрендә һәм оешмаларында 700 меңнән артык яшь һәм кыз хезмәт куя. «Наше время — Безнең заман» фестивале ярдәмендә без аның иҗади үсеше өчен шартлар тудырабыз. Бу предприятиедә корпоратив мәдәниятне үстерүнең иң яхшы рецепты. Үз яшьләренә ярдәм итүче предприятие һәм оешма җитәкчеләренә рәхмәт белдерәм», - диде Тимур Сөләйманов.
«Юл хәрәкәте иминлеге» ДБУ махсус приз – «Безнең заман герое» исеменә ия булды. Аларга кубок һәм 300 мең сум күләмендә акчалата премия тапшырылды.
Шулай ук номинацияләр буенча да бүләкләүләр үтте. Мәсәлән, «Музыка»да (ансамбльләр) беренче урынны Казан дәүләт казна дары заводы, «Аммоний» АҖ, Мамадыш районы Башкарма комитетының мәгариф бүлеге, «ТНВ»-Чүпрәле районы«ТЯГ» яшьләр канаты, Зәй районы башкарма комитеты, «Татэнерго» АҖ, «КАМАЗ» ГАҖ, «Юл хәрәкәте иминлеге» ДБУ, «Түбән Кама нефтехим»ГАҖ алды.
«Хореография» (кече формалар) номинациясендә архивариус Мәдинә Ветлугина һәм икътисадчы Гүзәл Әхмәтҗанова, Кама Тамагы районы Рудник урта мәктәбенең бию дуэты, Евгения Әхмәтҗанова, Зәй районы башкарма комитетыннан Светлана Ревина, Юлия Хәйруллина, Роза Маркелова, фасовщик Руфинә Гафурова һәм Питрәч районы «Ак Барс» Кошчылык комплексы операторы Вадим Молелевский, «Газпром трансгаз Казан» ҖЧҖ бухгалтеры Ләйсән Фаляхова һәм «Юл хәрәкәте иминлеге» ДБУ хореография квартеты җиңүче итеп табылдылар.