Татарстанда яшь сайлаучы елы: республика зәк сайлау комиссиясе һәм ТР Яшьләр министрлыгы хезмәттәшлек турында килешүгә кул куйдылар
Татарстан Яшьләр эшләре министрлыгы республика үзәк сайлау комиссиясе белән бергә яшьләрнең электораль грамоталылыгын арттырачак. Бу хакта килешүгә ведомстволар сишәмбе, 9 гыйнварда, кул куйдылар. Документка Татарстан Үзәк сайлау комиссиясе рәисе Андрей Кондратьев һәм Татарстан Республикасы Яшьләр эшләре министры Ринат Садыйков кул куйдылар.
Килешү яшьләрнең сайлау хокукларын гамәлгә ашыруда ярдәм итү өлкәсендә уртак эшчәнлек нигезләрен билгели. Документ эшчәнлекнең дүрт юнәлешен күздә тота: яшьләрнең хокукый мәдәниятен һәм электораль активлыгын үстерү, яшь һәм беренче тапкыр тавыш бирүче сайлаучыларны сайлау хокукларын гамәлгә ашыру мәсьәләләре буенча мәгълүматлаштыру, уртак яшьләр проектларын гамәлгә ашыру, шулай ук сайлау комиссияләре әгъзаларын һәм күзәтүчеләрне укыту.
- Татарстан Үзәк сайлау комиссиясе һәм республика яшьләр эшләре министрлыгының уртак эше яшьләр арасында электораль культураны күтәрүгә, сайлаулар турында белем таратуга ярдәм итәчәк, - дип билгеләп үтте Татарстан Республикасы Үзәк сайлау комиссиясе рәисе Андрей Кондратьев. - Ышанам, безнең килешү яшьләр министрлыгын һәм яшьләр оешмаларын мәгълүмати һәм методик ярдәм белән тәэмин итүгә ярдәм итәчәк.
- Яшьләр арасында электораль мәдәниятне үстерү буенча системалы эш төзү өчен тирән Хокукый белемнәр һәм энергия, активлык, мәгълүмат таратуга тривиаль булмаган караш синергиясе кирәк, - дип белдерде Татарстан Республикасы Яшьләр эшләре министры Ринат Садыйков. - Бу килешү безнең эш өчен җитди импульс бирә, эшчәнлекнең яңа горизонтларын ача.
Чара кысаларында яшь сайлаучылар клубларының 2024 елны яшь сайлаучы елы дип игълан итү инициативасы турында фикер алышу узды. Яшьләр җәмәгатьчелеге фикерләр алмашуга актив рәвештә кушыла. Студентлар лигасы президенты Шамил Якупов уртак эшнең мөһимлеген билгеләп үтте. «Бүген яшьләр сайлауларда катнашуның мөһимлеген аңлый. Икенче сорау: күпләр кая барырга, сайлау участогында нәрсә эшләргә, үзләрен ничек тотарга белми, ә бюллетеньне очраклы рәвештә бозган очракта нәрсә эшләргә кирәклеген белми... Безгә мәгълүмат кирәк. Бүген шундый мөһим эшнең башлануына мин бик шат!».
Татарстан Яшьләр эшләре министрлыгы һәм республика Үзәк сайлау комиссиясенең уртак эшчәнлеге кысаларында беренче чаралар гыйнварда ук уздырылырга тиеш.