40тан артык социаль әһәмиятле проект Татарстан Яшьләр министрлыгыннан 7 млн сум күләмендә грант ярдәме алачак
Физик затлар өчен ТР Яшьләр министрлыгы грант конкурсында 41 кеше җиңүче табылды, алар үзләренең социаль әһәмиятле проектларын гамәлгә ашыруга 7 млн сумлык ярдәм алачак. Яшьләрнең үз-үзләрен үстерә алулары өчен шартлар тудыру «Мәгариф» милли проектының бурычларына туры килә.
«Бүген яшьләр өчен мөһим булган физик затларга грантлар конкурсы проектына йомгак ясадык. 41 кеше үз проектын тормышка ашыру өчен акчалата ярдәм алачак. Бу инициативалар республикабызда яшәүчеләрдә кабул ителер һәм безнең төбәк үсешенә хезмәт итәр дип ышанам», - дип билгеләп үтте ТР Яшьләр эшләре министры Ринат Садыйков.
Конкурска барлыгы 500гә якын гариза бирелгән. Конкурс процедуралары нәтиҗәләрендә 14 юнәлеш буенча җиңүчеләр билгеләнде: «Гаилә кыйммәтләрен ныгыту» – 6 проект, «Карьера һәм һөнәри яктан үз – үзеңне үстерү» – 5, «Яшьләрнең иҗади инициативалары» – 3, «инвалид яшьләргә һәм мөмкинлекләре чикле булган яшьләргә ярдәм итүгә юнәлдерелгән инициативалар» – 4, «яшьләрнең иреклелек (волонтерлык) инициативалары» – 3, «яшьләрдә тирә – як мохиттәге тискәре күренешләрне профилактикалау – 3, социаль эшкуарлык - 3, яшьләргә психологик ярдәм күрсәтү механизмнарын үстерү - 3, мәдәниятара коммуникацияләр һәм милләтара хезмәттәшлек - 2, яшьләр медиасы – 2, яшьләрнең туризмга ярдәм итү инициативалары - 2 проект, патриотик тәрбия - 2, яшьләрнең фәнни инициативалары - 2, яшьләрнең ЗОЖГА ярдәм итү инициативалары - 1.
Мәсәлән, «Гаилә кыйммәтләрен ныгыту» номинациясендә җиңүчеләр арасында Анна Рукавишникованың сәламәтлек үзенчәлекләре булган балалары булган яшь гаиләләрнең, шулай ук яшүсмерләрне һәм яшьләрне тәрбияләүче гаиләләрнең иминлек дәрәҗәсен арттыруга юнәлдерелгән «Мөмкинлек юлы» проекты бар. Алар өчен психологлар белән ачык очрашулар, балалар эшләре күргәзмәсе, туристик сәяхәтләр һәм башка күп нәрсәләр оештырыла. Райнур Әхмәтшин «Битараф булмаганнар» проектын тормышка ашыру өчен 180 мең сум акча алган. Проект яшьләрне ирекле (волонтерлык) эшчәнлегенә җәлеп итүгә, яшьләр арасында сәламәт яшәү рәвешен һәм экологик белемнәрне пропагандалауга юнәлдерелгән. Проект Түбән Камада гамәлгә ашырылачак. Проектны гамәлгә ашыру кысаларында микрорайоннарда фестивальләр һәм экологик акцияләр узачак. Фестиваль 3 юнәлеш буенча уза: экологик, мәдәни-массакүләм һәм мәгариф.
Диана Сапуринаның «БРИКС проект мәктәбе» яшьләр өчен нәтиҗәле аралашу һәм эшлекле коммуникация күнекмәләрен үстерү, күп яклы дипломатия, шулай ук яшьләрнең эшкуарлык инициативаларын алга сөрү өчен реаль кейслар нигезендә практик мәсьәләләрне хәл итүдә тәҗрибә уртаклашу өчен мәйданчык булдыруга юнәлдерелгән.
Җиңүчеләрнең тулы исемлеге белән ТР Яшьләр министрлыгының рәсми сайтында танышырга мөмкин.