2023 елда Татарстаннан 432 яшь гаилә «Яшь гаилә» программасы буенча торак сатып алган
Узган, 2023 елда Татарстаннан 432 яшь гаилә «Яшь гаилә» программасы буенча торак сатып ала алган. Хәзерге вакытта «Яшь гаилә» – «Яшь гаиләләрне торак белән тәэмин итү» программасы буенча 2025 елда яшь гаиләләргә дәүләт түләүләрен алу өчен гаризалар кабул итү кампаниясе бара. Рөстәм Миңнеханов карары нигезендә, 2023-2025 елларга күрсәтелгән субсидияләр программасын республика финанслау ел саен 100 млн сум тәшкил итә.
Программага Татарстанның барлык шәһәр һәм районнарыннан яшь гаиләләр кереп, торакның норматив бәясеннән 30-35 процентын кире кайтарылмаган субсидия рәвешендә дәүләт ярдәме ала ала. 2024 елда ике кешедән торган гаиләгә дәүләт ярдәменең максималь күләме ике млн. сумга якын тәшкил итә, өч кешедән 2,5 млн. сумга якын, дүрт кешедән 3,3 млн. сум, биш кешедән торган гаиләләр өчен 4,1 млн. сумнан артык.
2025 елда субсидия алу өчен 2024 елның март-апрель айларында гаиләгә теркәлү (прописка) урыны буенча муниципалитет башкарма комитетына мөрәҗәгать итәргә кирәк, дип хәбәр итә ТР Яшьләр министрлыгы. Субсидияләрне әле программада булмаган яшь гаиләләр һәм узган елларда программага кергән яшь гаиләләр 2025 елда субсидия рәсмиләштерү өчен ала ала.
Документларны рәсмиләштерү өчен яшь гаиләгә кая мөрәҗәгать итәргә кирәклеге турында тулырак мәгълүмат ТР Яшьләр эшләре министрлыгы сайтында урнаштырылган.
«Яшь гаиләләрне торак белән тәэмин итү» республика төбәк проектын гамәлгә ашыру һәм «Яшь гаилә» программасы буенча субсидияләр бирү «Демография» милли проектының максатларына һәм бурычларына туры килә.
Милли проектлар Россиядә 2019 елдан ил Президенты Владимир Путинның «Май Указлары» нигезендә гамәлгә ашырыла. Алар илнең стратегик үсешенең 10нан артык юнәлешен үз эченә ала, мәсәлән, Сәламәтлек саклау, мәгариф, Экология, Демография, фән, Мәдәният, торак һәм шәһәр мохите. 2024 елның 29 февралендә Федераль Җыенга юллама белән чыгыш ясап, дәүләт башлыгы кадрлар, Россия яшьләре, озын һәм актив тормыш, гаилә һәм мәгълүматлар икътисады яңа милли проектларын игълан итте.