600 волонтер «Россия – Ислам дөньясы: KazanForum» халыкара икътисадый форумын үткәрүдә ярдәм итә
«Россия – Ислам дөньясы: KazanForum» ХV халыкара икътисадый форумын үткәрүдә 600 волонтер җәлеп ителгән. Бу хакта ТР Яшьләр эшләре министры Ринат Садыйков хәбәр итте.
«Форумда катнашу өчен 600 волонтер җәлеп ителгән. 535 волонтер – Казан шәһәре югары уку йортлары студентлары һәм Россия Федерациясенең төрле субъектларыннан 65 кеше. ТР Спорт һәм социаль проектлар дирекциясе белән берлектә волонтерларны сайлап алу һәм укыту үткәрелде. Волонтерлар 25 функциональ юнәлеш буенча бүленгән. Алар рәсми программа кысаларында да, сервис юнәлешендә дә ярдәм итәләр, шул исәптән катнашучыларны-форум кунакларын да озата баралар», – дип билгеләп үтте Ринат Садыйков.
ТР Спорт һәм социаль проектлар дирекциясенең Волонтерлар белән эшләү идарәсе җитәкчесе Айрат Мөбарәкшин сүзләренчә, барлыгы 2,5 меңгә якын гариза килгән. «Волонтерлар мондый масштаблы чаралар үткәргәндә төп ярдәмчеләр булып торалар. Вакыйгалы волонтерлык командасына хәрәкәтнең гамәлдәге вәкилләре дә, яңа килүчеләр дә эләгә ала. Һәр чара алдыннан һәр кандидатны җентекләп укыталар. Волонтерлар форум, аның максатлары һәм бурычлары, төрле категориядәге катнашучылар һәм оештыручылар, Форумның хөрмәтле кунаклары, чараның милли һәм дини үзенчәлекләре турында гомуми мәгълүмат формалаштыралар һәм үзләштерәләр, волонтерлар белән идарә итү системасы белән танышалар, волонтерларның төп компетенцияләрен эшкәртәләр», – дип ассызыклады Айрат Мөбарәкшин.