8 проектны гамәлгә ашыру өчен Татарстан югары уку йортлары 21,5 млн сум акча откан
Яшьләр эшләре буенча федераль агентлык югары белем бирү оешмалары арасында Бөтенроссия яшьләр проектлары конкурсы нәтиҗәләрен игълан итте. Конкурс нәтиҗәләре буенча Татарстан җиңгән акчалар суммасы буенча 10 нчы урынга чыкты. Татарстанның дүрт югары уку йорты – КДЭУ, КНИТУ, КДАУ, КФУ 8 проектны гамәлгә ашыруга 21,5 млн сум акча отты.
«Татарстан яшьләре грант конкурсларында һәрвакыт актив катнаша. Яшьләр эшләре буенча федераль агентлыкка уку йортлары өчен аерым юнәлеш булган өчен рәхмәт. Мондый ярдәм ярдәмендә уку йортларында яшьләребезнең үз – үзен тормышка ашыру өчен тагын да күбрәк мөмкинлекләр тудырыла», - дип билгеләп үтте ТР Яшьләр эшләре министры Ринат Садыйков.
Мәсәлән, Казан дәүләт энергетика университеты «Гаилә энергиясе» Республика гаилә интеллектуаль фестивален уздыруга 1 116 502 сум акча откан. Проектның максаты балалар һәм ата-аналар арасындагы элемтәләрне ныгыту өчен шартлар тудыру һәм 80 яшь гаиләне җәлеп итеп, җәйге фестиваль үткәрү ярдәмендә катнашучыларның когнитив үсешен активлаштыру.
Казан милли тикшеренү технология университеты Россия-Кытай яшь кадрлар нефть-газ мәктәбе проектын тормышка ашыруга 5,6 млн сум акча отты.
Казан дәүләт аграр университеты «Робосело» Бөтенроссия фәнни-технологик форумы» проектын тормышка ашыруга 2,9 млн сум акча отты. Проект кысаларында заманча җайланмаларны куллану күнекмәләрен үстерү, агросәнәгать комплексында, аграр югары һәм урта уку йортлары студентлары арасында эшләү өчен шартлар комплексы булдырылачак.
Казан федераль университеты «Идел буе федераль округының студентлар лидеры – 2024» Бөтенроссия конкурсының округ этабын гамәлгә ашыруга 1,7 млн сум акча отты. Проект Идел буе федераль округының профсоюз хәрәкәтенең 120 студент-лидерын җыячак һәм иң көчле студент лидерын ачыклаячак.
Исегезгә төшерәбез, Росмолодежьның Яшьләр инициативаларының грант конкурсы «Россия — мөмкинлекләр иле» платформасына керә.
Яшьләрнең үз-үзләрен тормышка ашыру өчен мөмкинлекләр булдыру «Мәгариф» милли проектының максатларына туры килә.