«Хәтер һәм хөрмәт»: Татарстан яшьләре ветераннар өчен тере коридор төзеде
Бүген гадәттәгечә 500дән артык балалар һәм яшьләр иҗтимагый оешмалары активистлары, волонтерлар, Татарстан Республикасы югары уку йортлары студентлары М.Җәлил исемендәге Татар академия опера һәм балет театры каршындагы мәйданчыкта Бөек Ватан сугышы ветераннары һәм сугыш хәрәкәтләре ветераннары белән тантаналы очрашу оештырдылар.
«9 Май алдыннан төрле патриотик чаралар уза, анда безнең яшьләр актив катнаша. Бүгенге акция ул безнең яшьләрне берләштерүче традицион акция. Биредә 500дән артык кеше җыелган һәм Бөек Ватан сугышы ветераннарын, тыл ветераннарын, сугыш балаларын сәламли. Монда хәзерге яшьләр безнең геройлар белән очраша һәм аралаша ала», — дип белдерде ТР Яшьләр эшләре министры Ринат Садыйков.
Без 1945 елгы Җиңү көне атмосферасын булдырырга теләдек, ул вакытта урамда сугыш җырлары уйнала, егетләр һәм кызлар бәйрәм вальсын бииләр, дип билгеләп үтә яшьләр оешмалары активистлары. Яшьләр тере коридор форматында тезелеп, кулларында «Җиңү өчен рәхмәт!» плакатын тоттылар. Уртада бер төркем егетләр «Хәтерлибез» дигән язма тотты. Ветераннар белән һәр автобус килгәч, барысы да «Ура!» дип тавыш бирде, рәхмәт әйтте.
Күп кенә яшьләрнең Бөек Ватан сугышында катнашкан туганнары белән бәйле шәхси тарихлары да бар.
«Менә инде 10 ел дәвамында мин Бөек Ватан сугышы ветераннарының яшьләр оешмалары активистлары һәм Татарстан Республикасы студентлары белән очрашуын оештыручы буларак катнашам. Бу вакыйгага катнашу – горурлык. Ел саен күңелдә ниндидер дулкынлану хисе туа. Без Бөек Ватан сугышы геройлары белән аралаша алу мөмкинлегенә ия булган бәхетле буын. Аларның тормышка аерым мөнәсәбәте, үз фәлсәфәсе бар. Минем әбием - Шихобалова Ольга Ефимовна – Бөек Ватан сугышы ветераны, тыл хезмәтчәне. Бер айдан соң аңа 100 яшь тула. Сугыш башлангач, ул бөтен гаиләсе белән Украинадан Казанга күченә, аңа 17 яшь була. Сугыш дәвамында 14 сәгать заводта эшли, берничә тапкыр тикшерү белән Туполев үзе килә. Дуслары аны минем бабам белән читтән торып таныштыралар, ул 21 яшьлек танк командиры була, ике ел алар хат алышалар. Ә сугыш тәмамлангач, Казанда очрашалар һәм инде бүтән аерылмыйлар», - дип сөйләде республика яшьләр үзәге директоры Валентин Шихобалов.
Минем бабам 19 яшендә Сталинград фронтына чакырыла, анда иңбашына яра ала, госпитальдән соң Курск дугасына эләгә, анда да яралана. Аның баш миендә гомер буена бер кисәк кала. Без бабайны бик яратабыз. Ул 2004 елда вафат булды, без ел саен Алабугага аның каберенә барабыз. Бабам минем килүемне бик көтте, миңа исем сайларга ярдәм итте, минем белән бала карады. Ул миңа ак күлмәк бүләк итте, мин аны хәзер дә саклыйм», — дип сөйләде волонтерлар хәрәкәте активисты Рената Вәлиева.